– తక్కువ ఆదాయాన్ని గడిస్తున్న 32శాతం మంది భారతీయులు
– 50శాతం మంది ఆదాయాలు, ఉద్యోగాలపై ప్రభావం
– తాజా సర్వేలో వెల్లడి
న్యూఢిల్లీ: ప్రమాదకర కరోనా మహమ్మారి ప్రపంచవ్యాప్తంగా వ్యక్తిగత ఆర్థిక పరిస్థితులపై గణనీయంగా ప్రభావాన్ని చూపుతున్నదని ఒక ప్రామాణిక చార్టర్డ్ సర్వే కనుగొన్నది. ఇప్పటికే మూడింట ఒక వంతు మంది తక్కువ ఆదాయాన్ని గడిస్తున్నారని వివరించింది. ఇక భారతీయుల్లో ఈ సంఖ్య 32శాతంగా ఉన్నదని తెలిపింది. అదేవిధంగా సగం కంటే ఎక్కువ మంది ఆదాయాన్ని లేదా వారి ఉపాధిని మహమ్మారి ప్రభావితం చేయొచ్చని సర్వే అంచనా వేసింది. దేశంలో మోడీ సర్కారు తీసుకున్న నిర్ణయాల కారణంగా ఆర్థిక పరిస్థితి కుంటుపడటంతో పాటు వాణిజ్య, వ్యాపారాలు దెబ్బతిని ఉద్యోగ, ఉపాధికి తీవ్ర నష్టం వాటిల్లిన విషయం తెలిసిందే. ప్రపంచవ్యాప్తంగా మూడు వంతుల మంది తమకు వృద్ధి చెందడానికి అవసరమైన డిజిటల్ నైపుణ్యాలు ఉన్నాయని నమ్మకంగా ఉన్నారు. ఈ సంఖ్య భారత్లో 89శాతంగా ఉండటం గమనార్హం. కాగా, కోవిడ్-19 తర్వాత పని ఏర్పాట్ల విషయంలో మరింత సౌలభ్యాన్ని ప్రపంచం కోరుకుంటోందని సర్వే వివరించింది. ముఖ్యంగా భారతీయులు ఈ సౌలభ్యాన్ని అధికంగా కోరుకుంటున్నారు.
ఆంక్షలు ఎత్తివేసిన తర్వాత 83శాతం మంది భారతీయులు వారంలో కనీసం రెండు రోజులు ఇంటి నుంచే పని కొనసాగించాలని కోరుకుంటున్నారు. ప్రపంచ వ్యాప్తంగా ఈ సంఖ్య 71శాతంగా ఉన్నది. అలాగే భవిష్యత్తులో కూడా మరింత సౌకర్యవంతమైన పని ఏర్పాట్లను 77శాతం మంది భారతీయులు కోరుకుం టున్నారు. ప్రపంచవ్యాప్తంగానూ ఇది 77శాతంగానే ఉన్నది. హాంగ్కాంగ్, తైవాన్, మెయిన్ల్యాండ్ చైనా, సింగపూర్, ఇండోనేషియా, మలేషియా, ఇండియా, యూఏఈ, కెన్యా, పాకిస్థాన్, యూకే, యూఎస్ఏ దేశాల నుంచి(12దేశాలు) 12 వేల మందిని ఈ సర్వేలో భాగంగా అధ్యయనం చేశారు. ఈ సవాలు సమయంలో ఆర్థిక శ్రేయస్సు, ఉపాధి దృక్పథం గురించి న సమాచారాన్ని అడిగి తెలుసుకున్నారు. ప్రపంచవ్యాప్తంగా, అధిక సంఖ్యలో యువకులు (18-34) తాము వృద్ధి చెందడానికి అవసరమైన డిజిటల్ నైపుణ్యాలు తమకు ఉన్నాయని విశ్వసిస్తున్నారు.
భారత్, కెన్యా, పాకిస్థాన్ దేశాల్లోని 88శాతం మంది ప్రజలు తక్కువ వేతనం కోసం పని గంటలు తగ్గించడాని కంటే.. ఎక్కువ పని చేయడానికి వారు సిద్ధపడతారని సర్వే వివరించింది.
వ్యక్తిగత ఆర్థిక వ్యవస్థను చక్కగా నిర్వహించే విషయంలో.. కెన్యా (93శాతం), ఇండోనేషియా(90 శాతం), మలేషియా (83శాతం)ల వెనుక భారత్ (82శాతం) ఉండటం గమనార్హం.
ఆన్లైన్ బ్యాంకింగ్ వృద్ధికి మహమ్మారి ఉత్ప్రేరకంగా పని చేస్తోంది. ప్రపంచవ్యాప్తంగా సగానికి పైగా ఆన్లైన్ సేవలను ఉపయోగిస్తున్నారు. వేగంగా అభివృద్ధి చెందుతున్న మార్కెట్లలో ఈ మార్పు మరింత స్పష్టంగా కనబడుతోంది. బ్యాంకింగ్ సేవలకు మొబైల్ పరికరాల వినియోగం విషయంలో భారత్(79శాతం), యూఏఈ(72శాతం), కెన్యా (69శాతం)లు ముందుగా ఉన్నాయి.
Courtesy: NT