వ్యాన్‌ డోర్లలో ఇరికి తెగిన వేలు

భరించలేని బాధతో రంగారావు విలవిల్లాడిపోయారు. హైరానా పడ్డ పోలీసులు వెంటనే ఆయన్ను వ్యాన్‌ నుంచి కిందికి దించారు. చికిత్స నిమిత్తం గాంధీ ఆస్పత్రికి తరలించారు. అక్కడ దాదాపు గంటసేపు ఉన్నా వైద్యులు సరిగా స్పందించకపోవడంతో సికింద్రాబాద్‌ సన్‌షైన్‌ ఆస్పత్రిలో ఆయన చేరారు. అక్కడ పరీక్షలు నిర్వహించిన వైద్యులు సోమవారం తెగిపోయిన బొటనవేలుకు శస్త్రచికిత్స నిర్వహించనున్నట్లు పేర్కొన్నారు.

అంతకుముందు వేలికి తీవ్రగాయంతో విలవిల్లాడిపోయిన రంగారావు ఘటనాస్థలంలో పోలీసులపై ఆగ్రహం వ్యక్తం చేశారు. ‘‘నన్ను కేసీఆర్‌ చంపమన్నాడా?’’ అంటూ తీవ్ర స్థాయిలో ప్రశ్నించారు. తెలంగాణ ఉద్యమంలో తాను ముందుడి పోరాడానని, జైలుకు కూడా వెళ్లానని.. ప్రస్తుతం ఆర్టీసీ కార్మికుల తరఫున పోరాడుతున్నందుకు ఇది తనకు కేసీఆర్‌ ఇచ్చిన బహుమాన మా? అని అవేదన వ్యక్తం చేశారు. కార్మికుల తరఫున పోరాడుతున్నవారిని భయబ్రాంతులకు గురిచేయడానికి ఇలాంటి సంఘటనలకు పాల్పడుతున్నారనే అనుమానం కలుగుతోందన్నారు. పోలీసులు నిర్లక్ష్యాన్ని ప్రదర్శించడం సబబు కాదన్నారు.